നീര് വെച്ച് വീർത്ത കാലുകൾ, ക്ഷീണിച്ച ശരീരം; പ്രശംസിക്കുന്ന സീനിന് പിന്നിലെ കഷ്ടപ്പാട് കാണിച്ച് തന്ന് റിഷബ്

ബോക്സ് ഓഫീസ് റെക്കോർഡുകൾ തകർത്ത് മുന്നേറുകയാണ് റിഷബ് ഷെട്ടി സംവിധാനം ചെയ്ത ബ്ലോക്ക്ബസ്റ്റർ ചിത്രം കാന്താര. എല്ലാ കോണിൽ നിന്നും സിനിമയ്ക്ക് മികച്ച അഭിപ്രായങ്ങളാണ് ലഭിക്കുന്നത്. സിനിമയുടെ ക്ലൈമാക്സ് രംഗത്തിനാണ് ഏറ്റവും കൂടുതൽ കയ്യടികൾ ലഭിച്ചിരുന്നത്. ഇപ്പോഴിതാ ഈ സീനിന് പിന്നിലെ കഷ്ടപ്പാട് തുറന്ന് കാണിക്കുകയാണ് റിഷബ് ഷെട്ടി. നീരുവെച്ച കാലുകളുടെ ചിത്രങ്ങൾ പങ്കുവെച്ചുകൊണ്ട് റിഷബ് പങ്കുവെച്ച പോസ്റ്റ് ചർച്ചയാക്കുകയാണ്.

'സിനിമയുടെ ക്ലൈമാക്സ് രംഗം ചിത്രീകരിക്കുമ്പോൾ കാലുകൾ നീര് വെച്ചിരുന്നു, ശരീരം ക്ഷീണിച്ചിരുന്നു.. എന്നാൽ ഇന്ന്, ക്ലൈമാക്സ് ദശലക്ഷക്കണക്കിന് ആളുകൾ കാണുകയും അഭിനന്ദിക്കുകയും ചെയ്യുന്ന ഒന്നായി മാറിയിരിക്കുന്നു. ഞങ്ങൾ വിശ്വസിക്കുന്ന ദിവ്യശക്തിയുടെ അനുഗ്രഹം കൊണ്ട് മാത്രമാണ് ഇത് സാധ്യമായത്. ഞങ്ങളെ പിന്തുണച്ച എല്ലാവർക്കും ഹൃദയംഗമമായ നന്ദി,' എന്നാണ് റിഷബ് ഷെട്ടി പറയുന്നത്.

അതേസമയം, ബോളിവുഡിലെയും തെലുങ്കിലെയും ചില വമ്പൻ സിനിമയുടെ കളക്ഷനെ കാന്താര മറികടന്നു. സൽമാൻ ഖാൻ ചിത്രമായ സിക്കന്ദറിനെയും ഷങ്കറിന്റെ ബ്രഹ്മാണ്ഡ സിനിമയായ ഗെയിം ചേഞ്ചറിനെയുമാണ് കാന്താര മറികടന്നത്. 110 കോടി ആയിരുന്നു സിക്കന്ദറിന്റെ ഡൊമെസ്റ്റിക്ക് കളക്ഷൻ. അതേസമയം, ഗെയിം ചേഞ്ചർ നേടിയതാകട്ടെ 131 കോടിയും. ഇങ്ങനെ പോകുകയാണെങ്കിൽ ചിത്രം 1000 കോടി നേടുമെന്നാണ് കണക്കുകൂട്ടൽ. ആദ്യ ദിവസം ഇന്ത്യയിലെ വിവിധ ഭാഷകളിൽ നിന്ന് 61.85 കോടി രൂപ സിനിമ നേടിയെന്നാണ് കണക്കുകൾ. കന്നഡയിൽ നിന്ന് 19.6 കോടിയും, തെലുങ്കിൽ നിന്ന് 13 കോടിയും, ഹിന്ദിയിൽ നിന്ന് 18.5 കോടിയും, തമിഴിൽ നിന്ന് 5.5 കോടി, മലയാളത്തിൽ നിന്ന് 5.25 കോടി എന്നിങ്ങനെയാണ് കളക്ഷൻ റിപ്പോർട്ടുകൾ.

2022ൽ റിഷഭ് ഷെട്ടിയുടെ സംവിധാനത്തിൽ റിലീസ് ചെയ്ത് വൻ വിജയം നേടിയ കന്നഡ ചിത്രമാണ് കാന്താര. കന്നഡയിൽ ഇറങ്ങിയ ചിത്രം പിന്നീട് മികച്ച അഭിപ്രായം നേടിയതിനെ തുടർന്ന് വിവിധ ഭാഷകളിലേക്ക് മൊഴിമാറ്റി എത്തുകയായിരുന്നു. ചിത്രത്തിലെ അഭിനയത്തിന് മികച്ച നടനുള്ള ദേശീയ പുരസ്കാരവും റിഷഭിനെ തേടിയെത്തിയിരുന്നു. പൃഥ്വിരാജ് പ്രൊഡക്ഷൻസ് ആണ് സിനിമ കേരളത്തിൽ എത്തിക്കുന്നത്.

Content Highlights: Rishab Shetty's post shows the hardship behind the praise scene in Kantara